Liaba Kurt mia sama kemma,
woll'n di a weng in Anspruch nehma.
An Grund moan ma, den werst scho ahna
es is des Gründungsfest vo unsere 'Riedlstoana.
Des Johr, do lad'n mia Trachtler ein,
achz'g Johr oid is dann der Verein.
Trachtler aus unserer Region wer'n zu uns kemma,
um mit uns z'feiern und ehrene Glückwünsch mit nemma.
Und sche soll's wer'n - is unsa Zui,
dafür is uns koa Arbat z' vui
Mia woll'n koa Fest für uns alloa,
teilnehma soll de ganze Gmoa.
Und jetzt sei länger ned voschwieg'n,
dad uns no wos am Herz'n lieg'n.
So wia des Sitt und oida Brauch,
g'hört zu dem Fest a Schirmherr auch.
Wer des wohl sei soll - ham mir uns g'fragt ?
ned lang hod's dauert und ham a Antwort g'habt.
Da Vogl Kurt Chef vo Möbl Vogl in Arra',
weil er is ja a oana vo de 'Riedlstoana.
I moin Kurt, dass de bitt bei dir scho passt,
weil Du für de 'Riedlstoana a'wei wos übrig hast.
Mit dir kann unser Fest auf's Beste gelinga,
mir san überzeugt, du wirst uns vui Glück bringa.
An weiß blaua Schirm, des Utensil für deine Macht,
ham ma dir nätürlich a mit'bracht.
Indem's das tuasd in Händ'n halten
hoff ma, du muasst eam nie entfalten.
Und bitt'n dich um ein Gebet
zum Herrgott: renga soll's hoid ned.
Und jetzt zum Schluss dad'n mia di bitt'n:
Wuis't Schirmherr sei in uns'rer Mitt'n ?
Es waar a Freid und dad uns ehr'n.
Drum lass uns jetzt dei Antwort hör'n.